एमाओवादी उपाध्यक्ष श्रेष्ठ र महासचिव बोगटीद्वारा राजीनामा

 ५ साउन, काठमाण्डौ । एकीकृत नेकपा माओवादीका उपाध्यक्ष नारायणकाजी श्रेष्ठ र महासचिव पोष्टवहादुर बोगटीले पदवाट राजीनामा दिनु भएको छ । पार्टीलार्इ  अध्यक्षको एकल नेतृत्वमा अघि वढाउने सहमति भएपछि उपाध्यक्ष नारायणकाजी र महासचिव बोगटीले शनिवार राजीनामा दिएका हुन् । उनीहरुले शनिवार विहान बसेको ब्यूरो इन्चार्जको वैठकमा नै  पदवाट राजीनामा दिएको स्रोतले जनाएको छ । 

शुक्रवारवाट ललितपुरको खन्ना गार्मेन्टमा  सुरु भएको विस्तारित वैठकमा शनिवार अध्यक्ष पुष्पकमल दाहाल प्रचण्डले पेश गरेको राजनीतिक प्रतिवेदनमाथि १६ वटा समूहले  आआफ्नो  धारणा राखेका थिए । समूहगत छलफल सकिएपछि वैठक भोलि मध्यान्ह १२ बजेसम्मका लागि स्थगित भएको छ ।

यसअघि उपाध्यक्ष डा बाबुराम भट्टराईले पनि पार्टीभित्र पद लोलुपता देखिएकोप्रति असन्तुष्टी जनाउदै पदवाट राजीनामा दिनु भएको थियो । पार्टी अध्यक्ष प्रचण्डले उपाध्यक्ष दवाट डा भट्टराईले राजीनामा दिएपछिको अवस्था व्यवस्थापन गर्न  एकल नेतृत्वमा पार्टीलाई अगाडि वढाउने प्रस्ताव गर्नु भएको थियो ।  एमाओवादी २०६६ सालमा बहुपदीय प्रणालीमा आएको थियो ।